ചിക്കാഗോ: ഇന്ത്യ പെന്തെകോസ്ത് ദൈവസഭ സീനിയർ ശുശ്രൂഷകനും, സൺഡേ സ്കൂൾ അസോസിയേഷന്റെ മുൻ ഡയറക്ടറും, ഹോസ്പിറ്റൽ മിനിസ്ട്രിസ് ഓഫ് ഇന്ത്യ ചെയർമാനും, ഐപിസി പാമ്പാടി, വൈക്കം സെന്ററുകളുടെ മുൻ സെന്റർ മിനിസ്റ്ററുമായ പ്രൊഫ. പാസ്റ്റർ റ്റി.സി കോശി (91) കർത്തൃസന്നിധിയിൽ ചേർക്കപ്പെട്ടു. സംസ്കാര ശുശ്രൂഷകൾ ജനുവരി 16,17 തീയതികളിൽ ചിക്കാഗോയിൽ നടക്കും.
ജനുവരി 16 വെള്ളി വൈകിട്ട് 5 ന് മൗണ്ട് പ്രൊസ്പെക്റ്റിൽ സയോൻ ക്രിസ്ത്യൻ ചർച്ചിൽ മെമ്മോറിയൽ സർവീസ് നടക്കും. 17 ന് ശനി രാവിലെ 9 ന് അവിടെ വെച്ച് സംസ്കാര ശുശ്രൂഷകൾ ആരംഭിച്ച് ഉച്ചയോടെ നൈൽസിലുള്ള മേരിഹിൽ സെമിത്തേരിയിൽ സംസ്കരിക്കും.
ചേർത്തല സെന്റ് മൈക്കിൾസ് കോളജിലെ ഇംഗ്ലീഷ് വിഭാഗം മേധാവിയായി സേവനമനുഷ്ഠിച്ചിട്ടുണ്ട് പരേതൻ. ബൈബിൾ സൊസൈറ്റി ഓഫ് ഇന്ത്യയുടെ നേതൃത്വത്തിൽ ബൈബിൾ പരിഭാഷ നിർവഹിച്ചിട്ടുണ്ട്. വേൾഡ് വിഷന്റെ വിവിധ സി.ഡി പ്രോജക്റ്റുകൾക്കും നേതൃത്വം നൽകിയിട്ടുണ്ട്. ഹെബ്രോൻ ബൈബിൾ കോളേജ്, ഐപിസി കോട്ടയം തിയോളജിക്കൽ സെമിനാരി എന്നിവിടങ്ങളിൽ ദീർഘകാലം അധ്യാപകനായിരുന്നിട്ടുണ്ട്.
ഭാര്യ: റാന്നി കപ്പമാംമൂട്ടിൽ ചിന്നമ്മ (യുഎസ്). മക്കൾ: ഡോ. പാസ്റ്റർ അലക്സ് ടി.കോശി, പാസ്റ്റർ സിസിൽ സാം കോശി, പരേതനായ പാസ്റ്റർ ബെൻ ജോർജ് കോശി (എല്ലാവരും യുഎസ്). മരുമക്കൾ: എലിസബത്ത് കോശി, അനി കോശി, സീന സിസിൽ (എല്ലാവരും യുഎസ്).
ടിസി ഇട്ടി, പരേതനായ പ്രൊ ടിസി മാത്യു, ഡോ. ടി.സി മത്തായി, സൂസൻ മണിയാറ്റ് എന്നിവർ സഹോദരങ്ങൾ ആണ്. വിവരങ്ങൾക്ക് 847 912 5578.
